كل شئ فيه الحلو وفيه (الكُخه)!!

عدد الرسائل : 220 تاريخ التسجيل : 27/12/2008

طول عمرنا بنكتب ونتكلم ونقول يخرب بيت الحكومة وسنين الحكومة وحكومة ورا حكومة ولا في فايدة!!

ونسينا بل وتناسينا إنجازات الحكومة ودورها الكبير نحو الشعب والمواطن البسيط محدود الدخل!
وأستغفر الله لأننى ظلمت الحكومة (سواء حكومة نظيف ولا حكومة عبيد) وأننى عارضتها فى كل ممارساتها منذ بداية إنجازاتها العظيمة!!
وقررت فى هذا المقال أن أرصد إنجازات الحكومة التى شاهدتها عيناً وأعتقد أن الكثير من أفراد الشعب عايشوها..يمكن ضميري يرتاح.
نتكلم عن المشكلات اللى عايش فيها الشعب المصري ودور الحكومة اللي عملته فيها وإنجازاتها الخفية التى سأخرجها للنور فى هذا المقال.
نيجى لأهم مشكلة دلوقتى بيشتكي منها الشعب ألا وهي رغيف العيش..وعمالين بس نقول أزمة رغيف العيش ومش طايلين العيش ومفيش رغيف واحد بيدخل البيت والحكومة كدابة وما بتعملش حاجه..لأ بقى يا حلو..
ديك النهار أنا شايف بعنيه دول اللى هياكلهم الدود واحده ست خارجة من طابور العيش ومعاها 15 رغيف عيش بحالهم..أى والله زي ما بكلمك 15 بالتمام والكمال..يعنى ليه إحنى بقى نفضل نمسك فى السلبيات ونسيب الإيجابيات..ما فى واحدة أهيه أخدت عيش وروحت وهي مبسوطة وعال العال..أي نعم خرجت متبهدلة من الطابور بس معلش ما هي الحياة كفاح ولا إنتوا عايزين العيش يوصل لحد بيوتكم..أما غريبة والله.
نتكلم بقى عن البطالة واللى عمالين يقولوا نص الشباب المصري عاطل ومش لاقي شغل وبيخرج من الجامعة على القهوة عدل!!
تقدر تقولي كام شاب إبن وزير ولا مسئول كبير ولا عنده واسطة جامدة وما إتوظفش..ولا واحد طبعاً!!
يعنى الحكومة ومسؤوليها بيشتغلوا بإيديهم وسنانهم وشعر صدرهم كمان علشان يحدوا من نسبة البطالة والشباب يشتغل..والدنيا كفاح برده!
هنتكلم عن مستوى الأمن والأمان فى البلد..وطبعاً الكلام اللى بيتقال إن السرق والقتل إنتشروا بصورة واضحة وكبيرة جداً فى الفترة الأخيرة..وإن أي واحد يخاف يمشى فى الشارع بالليل لوحدة وخصوصاً فى المدن الريفيفة زي زفتى كده!!
لا يا حبيبى..آخر إحصائية وصلتنى إن الأمن من يومين قبض على 3 نشالين و حرامي غسيل وواحد مشتبه فيه و 16 واحد تحري.وحوالى كام الف قال اية منحرفين و بيصلو الفجر جماعة.والمتهم الرئيسى فى قضية تسريب شكارة دقيق من فرن العيش..إنكر بقى الشغل ده..إكفر بقى وكدب الإحصائيات دي والدور الكبير اللى بيقوم بيه الأمن.
ده غير الجهود الكبيرة فى تأمين الوزراء والمسؤولين الكبار..مش دول اللى بيتعبوا علشانا ولازم تتوفر لهم كل وسائل الحماية منك ومن أمثالك المغرضين الحاقدين ناكرين الجميل!
نروح شويه عن مياة الشرب..والإشاعات الكبيرة عن تلوث المياة فى النيل وفى محافظات مصر..طول عمر أجدادنا وستي وستك بيشربوا الميه بدون طعم ولا لون ولا رائحة..حاجة مملة خالص وتخنق..مع حكومتنا الموقرة وفرتلك إنك تشرب المية بلون وطعم وريحة كمان..وبنفس التمن..شفت قد إيه كنا ظالمينها؟!!
الناس بقى اللى بتقول ده مترو الأنفاق بيعمل حوادث وما صدقوا حصلت حادثة الفترة اللى فاتت والمتروا دخل فى الرصيف وهاتك يا كلام..يعنى مسكتوا فى الغلطة دي ونسيتوا ليه الإنجازات التانيه!!
وأنا فى القاهرة من يومين ركبت المترو من المظلات ووصلت بيه جامعة القاهرة سليم معافى ميه المية ولا حصل لينا أي حاجة ونزلنا مبسوطين ومزأططين..إشمعنى المتروا ده ما بيتكلموش عنه وإنه وصل بالسلامة الحمد لله.!
هنيجى للمشكلة الكبيرة جداً وهي غلاء الأسعار..والناس اللى بتقول الرز غلي والزيت والدقيق وكل حاجة فى الطالع ما بتنزلش أبداً..يعنى الحكومة هتعمل إيه دلوقتى فى ظل إزدياد سعر البترول..ده بيقولك سعر البرميل وصل 150 دولار يبقى مش عايزين الزيت والرز يغلى!!
هو الرز ده مش بيحتاج بنزين وسولار ولا هيطلع رباني كده..ثم الحاجة بتغلى جنيه ولما الناس بتصرخ الحكومة بتنزلها 10 قروش وإحنا بنفضل نزغرت..نسيتوا دي ليه بقى والإنجازات دي..كل ما تغلى الحاجة الضعف وإحنا نعمل مظاهرات وهما ينزلوا شلن أو شلنين على حسب بقى..يعنى الحكومة بتستجيب أهه.
وبعدين الحمد لله صرفتلكم الحكومة 30% عايزين إيه أكتر من كده؟!..زودت على دخل الموظفين 30 % وعلى مصروفات المدارس والكليات وأسعار السلع الغذائية والسولار والبنزين برده 30 %..يعنى مش حارمة حد من حاجة بتزود على الكل بالتساوي وبكل شفافية ومن غير ظلم!
ولا الفراخ اللى أنا شخصياً بموت فيها..إيه المشكلة لما زاد سعرها أضعاف..هو إنت فاكر فراخ زمان زي فراخ دلوقتى يا شاطر..لا طبعاً..زمان كانت فراخ عادية كده من اللى بتكاكي وخلاص..إنما الأيام دي الفراخ المعدلة وكلها أوبشن..إنت عايز كل الكماليات والأوبشن ده والسعر زي ما هو..يا شيخ إتقي الله.
وكذلك اللحمة اللى هي برده فى الأساس جاية من جاموس وأبقار كلها أوبشن والجاموس دلوقتى بسم الله ما شاء الله بقى 6 سلندر 1500 سي سي!!
الإعلام المصري ودوره الكبير فى كشف الحقائق وتغطية الأحداث وناكرين ده وعمالين نقول الجزيرة والعربية..أنا أكتر واحد أشهد مش لأني بشتغل فى مجال الإعلام لا أبداً ولكن أصبح فى الإعلام المصري قوة شديدة فى تغطية ومتابعة الأخبار والأحداث لدرجة إنك تسمع عن الخبر فى التليفزيون قبل ما يحصل بيومين تلاته..هاتلي أي تليفزيون يقدر يسبقنا فى السرعة الرهيبة دي بالصلاة ع النبي!!
والرشاوي بقى وعمالين نقول رشاوي وسرقة..يا رااااااااااااااجل..ما هي السرقة فى كل مكان..إيه يعنى لما الموظف يقلب عيشه دي شطاره يابا مش سرقة..ثم أنا أعرف 3 موظفين ما بياخدوش مليم واحد من حد..ليه بقى ما إتكلمناش عن دول وعن إخلاصهم وتفانيهم فى العمل وسايبينهم ومركزين فى كام ألف واحد بياكلوا..بالذمة ده كلام؟!!
عموماً كل شئ فيه الحلو وفيه الكُخه..ولابد أن لا ننظر فى الكوب الفارغ وأن ننظر وندقق ونتمعن فى الشويه اللى فى قعر الكوب نفسه ونحمد ربنا ونبوس إيدينا شعر ودقن..غيرنا مش لاقيين لا غدا ولا عشا إنما إحنا الحمد لله بنفطر ونتغدى..وحلو أوي على كده!!
و أنا لو فضلت من هنا لتاني يوم مش هيكفي كتاب بحالة (لوكشة واحدة) عن إنجازات الحكومة اللى كلنا حاسين بيها وعارفينها وبننكرها للأسف وعمالين نقول (غلاء) و(علاء) و(عز)..وهيفا ونانسى وباكينام..والساعة فى إيدك كام يا عمو الساعة كام!!
مش هتقدر

عدد الرسائل : 220 تاريخ التسجيل : 27/12/2008

كل شئ فيه الحلو وفيه (الكُخه)!! _40791251_coffeeshopcairo203

كل شئ فيه الحلو وفيه (الكُخه)!! 24335046rn6

كل شئ فيه الحلو وفيه (الكُخه)!! Desert-for-baby

كل شئ فيه الحلو وفيه (الكُخه)!! Le_3yoon_al7abeba

كل شئ فيه الحلو وفيه (الكُخه)!! 23052005223003-0

عدد الرسائل : 220 تاريخ التسجيل : 27/12/2008

لا اسمع لا ارى لا اتكلم كل شئ فيه الحلو وفيه (الكُخه)!! 2554331_normal

خلى السلاح صاحى صااااااااااااااااااااااااااااحى لو نامت الدنيا نايم مع سلاحى
كل شئ فيه الحلو وفيه (الكُخه)!! 7028272f39bd00211985339yu5

احسن شئ عندنا المعاملة الحسنة
كل شئ فيه الحلو وفيه (الكُخه)!! Cdocumentsandsettingsadministrator_007

احدث ما وصلت الية تكنولوبيا المستشفيات
كل شئ فيه الحلو وفيه (الكُخه)!! ATT00482

المواصلات فااااااااااااااااااااااااااااااضية
كل شئ فيه الحلو وفيه (الكُخه)!! 31er0