بسم الله الرحمن الرحيم
اليوم بعد طول انتظار قمنا بعمل حوار مع شاب من شباب كفر السودان بعد ان سمح لنا بوقتة الغالى الثمين وقال لنا بنفس اللفظ (خلصونى علشان انا مش فاضى ) قال لنا نبدأ على طول الحوار لو سمحتوا وطبعا لن نتردد لحظة وقمنا بإستغلال الوقت الثمين لدية وتم عمل هذا الحوار س.نتعرف بحضرتك لو سمحت ج.حلوة حضرتك دى ياعم خلى البساط احمدى وبلاش تكلفة احنا كلنا ولاد تسعة بصراحة انا معرف يعنى اية تسعة بس انا طلعت لقيتهم بيقولو كدة انا وبدون فخر اخوك عملاق الحب الدباح ومحطم قلوب العذارا ومش بس كدة ومشحتف قلوب الحيارا إسال عنى اى شاب فى البلد الف واحد يدلك س. ماشى ياعم المشحتف من اولها كدة نخع المهم ممن نتكلم شوية عن كفر السودان وبعدين نتكلم عنك ياعم العملاق؟ ج.مافيش مشاكل بص اخوك بيتكلم فى كل حاجة حتى البورصة ممكن اكلمك فيها ؟ س.الصبر يارب بورصة اية ياعم بقولك كفر السودان الله يبارك لك ركز معانا شوية ؟ ج.عايز اية بالظبط فى كفر السودان اكلمك عنة. اكلملك عن المنشية وال العزبة وال وسط البلد وال معلب الحاج على عبدة وال النادى وال المستشفى وال اية بالظبط حدد واخوك زى البربنط س. بداية زى الفل ياعم الدباح شكلك هتكمل معانا ؟ ج.ولا يهمك انا تحت امركفر السودان واسرة الموقع وكل الناس الحلوة ال بتشوف الحوار س.اية رائيك فى شباب كفر السودان ؟ ج.بصراحة وبدون زعل شباب كفر السودان من احسن شباب على مستوى المحافظة بس فية شوية سلبيات شوية يعنى لما تكلم شاب تلاقية محبط ومافيش طموح ورغم ان عندة افكار تأهلة يكون احسن مما يتمنى( حلوة تأهلة دى ..معلش اخوك مثقف بقى وكدة ..وبعدين انا منهم احنا مقصرين شوية من الناحية الدينية مش شوية شويتين وحياتك. والواحد بيفقد اعصابة على اقل شئ يعنى ممكن الواحد بيلعب كورة وحاجة صغيرة تحصل تلاقى الواحد يشوط الكورة فى البر التانى او فى الترعة او حسب اتجاة الشوطة وبعدين موضوع السجاير دة كلنا بنحاول نشرب من سن خمس سنين وانت طالع تشوف العجب ومابنحاولش نشغل نفسنا بحاجة خالص رصف فى البلد صرف صحى تظبيط المستشفى اى حاجة تخص البلد نقول فية ناس كبيرة هى ممكن تتكلم وبجد انا كل دة بتكلم عن نفسى علشان محدش يزعل منى وبحاول اخلى دماغى فاضية واقول كل واحد عندة ال مكفية رغم اننا ممكن نكون احسن من كدة بكتير لو فكرنا مع بعض وحد اهتم بالشباب وسمع لهم عندهم افكار جميلة جدا ولكن ....."
س.رسالة ترسلها الى اشخاص فى البلد ممكن ؟ ج.انا خايف حد يزعل منى ادينى الامان س.معاك الامان دى بلدك ودى ناسها براحتك؟ ج.اولا انا هتكلم عن نفسى انا برسل رسالة الى استاذنا جميعا الاستاذ محمد الحليسى احنا الشباب محتاجينك جدا ونفسنا نتكلم معاك كتير لو نص مجهودك دة لنا هتغير فينا حاجات كتير احنا اولى من اى بلد اخر بجد محتاجينك عندنا مشاكل كتير واحلام كتير وحاسين بالضياع نفسنا تكون معانا على طول ماتزعلش منى بجد نفسى اكون انسان ............ برسل ايضا رسالة الى حبيب الشباب والكبار ايضا استاذنا الاستاذ ايمن حجازى بجد خبر نقلك من البلد كان صدمة لجميع الشباب. حسسنا ان البلد خلاص زى مابنقولو بالبلدى اتقل بركتها محتاجينكم انت واخوتك كل واحد بمجالة انتو شرف لكفر السودان دى بلدكم محتاجة لكم جدا وبعدين انت عارف اولى الناس بالدعوة الاقربون فالاقربون اهل بلدك اولى بيكم انت واخوتك من حوالى خمس سنين او اكثر خرج من البلد الاستاذ حسن الشعتى والاستاذ نصر الشعتى واولادهم واصبحت كفر السودان بالنسبة لهم مجرد زكريات ياعم الحاج ومش عايزنى اخاف على كفر السودان اصبحت الهجرة منها اسهل شئ حتى الناس الموجودين بها غرباء مع بعض لية بس قلبت المواجع عليا وتقولى اسمك عملاق الحب الدباح لية بعد كل دة .......... برسل رسالة الى حبيب قلبى الاستاذ عبداللطيف /ابو معاذ ممكن سؤال اين انت. الحياة اخذتك منا جدا لكن عارفين الحياة صعبة وشاقة بس بجد محتاجينك جدا فى البلد مع الشباب زى الاول ارجع بالذاكرة خمس سنين بس.. اختلاف كبير بجد محتاجينك .......... برسل رسالة لجميع علماء بلدنا الموجودين والمغتربين اين انتم من بلدكم الجميلة بجد انا عندما شاهدت مقالات الدكتور عادل ورسالة الدكتور محمد مدكور حسيت فعلا ان كفر السودان بخير بجد محتاجين لجميع العلماء والاطباء ومش بس كدة محتاجين جميع المؤهلات والطبقات لكى نكون اجمل قرية بالفعل ولكن.." رسالة الى اهل البلد لازم نحس ببعض شوية ولازم نكون يد واحدة عندى اسماء كتير نفسى ارسلهم رسائل بالاسم .بس خلينى كاتم فى قلبى وساكت رسائل لكبارات البلد وللعمدة وللمدرسين وللموظفين وللشباب وللاطفال ايضا عندى كلام كتيييييييييييييييييييير جوايا حاسة. ونفسى حد يحس بية بلدنا محتاجة حاجات كتير لية بس قلبتو عليا المواجع انا بهرب من كل دة وبفرح لما حد يقولى عملاق الحب الدباح بحس انى بعمل حاجة اى نعم شئ مالوش فايدة بس اعمل اية محدش حاسس بينا عندى احلام عندى طموحات بس وضعتها كلها فى قفص وقفلت عليها لحين ميسرة انا عارف كلكم بتقولو العيب فيك بس احنا محتاجين لكم جميعا معلش طولت شوية فى اجابة السئوال دة بس لو عندكم وقت عندى كلام اكتر من كدة بكتير. رسالة لكل شخص بالاسم فى البلد اقولة راجع نفسك واسأل نفسك اين انت من كفر السودان مغترب او موجود كبير اوصغير غنى اوفقير فينك من زماااااااااااااااااااااااااااااان
س.ياااااااااااااااااة كل دة فى قلبك ؟ ج.معلش بقى اصل انا قلبى مساكن شعبية على رائ المطرب محمد منير وعلى فكرة دة جزء من ال جوايا ماينفعش حوار لكم دة ممكن يكون كتاب او مجلد او حتى مجلة س.احلامك بإختصار ؟ ج.كل كفر السودان يحسو ببعض ويحبو بعض وانت تلاقى الاعمى فتح والاخرص غنا وتلاقى الدنيا بقت جنة س.انت شاعر كمان ؟ ج.ههههههههههههههههه اة شاعر كبييييييييييييير بس شاعر بالاحباط س.نفسك فى حاجة قبل ماتموت قصدى قبل مانختم الحوار؟ ج.هههههههههههه بجد انا بشكركم جميعا لصدركم الواسع كان نفسى حد يسمع لى من زمااااااااان واسف كمان مرة انى طولت عليكم فى اجابة الاسئلة س.كلمة تحب تقولها ؟ ج.معلش اسلوبى فى الاجابة تعبان شوية زى مابتقولو سوقى شوية او بمعنى اخر بلدى شوية بس انتو اكيد هتحسو بية واى حد قولت اسمة والله العظيم انا بحبة جدا جدا وبقولة ماتزعلش منى اعتبرنى ابنك او اخيك او حتى جارك وتدعيلى ان ربنا يهدينى س.ممكن نعرف اسمك الحقيقى؟ ج.ياعفريت عايز تسحبنى فى الكلام علشان اقول على اسمى وتقيمو عليا الحد وتدبحونى عند الحنفية الكبيرة هههههههه ان شاء الله هقول على اسمى بس لما احس انى بقيت انسان حقيقى وساعتها مش هسمح لاى حد يقولى عملاق الحب الدباح ولا حتى الشاب مفتاح... فى النهاية نشكر الشاب مفتاح قصدنا الشاب عملاق الحب الدباح ال مجوع الفراخ ووعدنا بعمل حوار معة بعد فترة ولكن لن يحدد لنا سنة كام وقال لنا (حين ميسرة او حتى عند المعصرة) ونشكر كل من كان عندة صبر وشاهد الحوار للنهاية والسلام عليكم ورحمة الله وبركاتة
الجمعة أبريل 22, 2011 10:26 pm من طرف زائر
