كوباية شاى بلبن

موضوع: كوباية شاى بلبن الخميس مايو 28, 2009 8:13 am

كوباية شاى بلبن

الدنيا
مكان غريب جدا جدا
طول الوقت تشوف وتعرف أشكال وأنواع من البشر منهم الكويس وكتير منهم مش تمام
مكان غريب الواحد بيعيش فيه
مليان بالأبيض والأسود
بالخير والشر
بالحب والكره
بالحياه .. والــمــوت
مكان غريب سعات بيكون الواحد مضطر يعيش فيه مع أنه مش عايز كده
مش طايق يكون موجود فيه ولو لثانيه واحدة
بس اللى يخلى الواحد يستغرب أكتر من الحياه لما نفس الحد ده _المخنوق من دنيته_ فى وقت تانى تلاقيه سعيد
ومستمتع ومستلذ بالحياه لدرجه أنه مش عايز يسيبها أبداً ونفسه يعيش فيها الف مليون سنه!!!
يا ترى ايه السر فى كده
أيه سر الحياه
أيه اللى بيخليها سعات بمبى وزهرى وكل ألوان قوس قزح
وسعات بتبقى سوده وغامقه
ياترى مين اللى بيأثر فى التانى
هل احنا اللى بنشكل حياتنا وبإدينا بنخليها حلوه أو وحشه
ولا حياتنا هى اللى بتشكلنا وبنكون ذى ما هى بتكون
سواء حلوه أو وحشه
ويعنى أيه حلو أو وحش بالنسبه للحياه
سعات بتلاقى الحاجه الوحشه والقذره جدا حلوه قوى عند ناس تانيه
مثلا الخنزير
أحقر وأقذر كائن
تلاقى ناس بتعشق تاكله وبتتفنن فى طبخه وبيكون بمثابه وليمه بالنسبه ليهم
اللى أقصده أن كل شئ فى الحياه دى نسبى
كل واحد له قواعده وتفكيره اللى بيقيس بيه وبيحكم من خلاله على الحياه
ومره تانيه أرجع لسؤالى
أيه سره الحياه
وليه سعات بتكون بمبى وسعات بتكون سوده
وهل أحنا اللى بنشكل حياتنا على مزاجنا ولا هى اللى بتتطبخنا وتسوينا
بالنسبه ليا الحياه عامله ذى كوبايه الشاى باللبن
فيها جزء أسود وجزء أبيض
وأكيد أحنا اللى بنتحكم فى حياتنا
ذى بالظبط كوبايه الشاى بلبن
انتا اللى بتظبطها على ذوقك
بتحط السكر بكميه معينه
والشاى
وبتضيف شويه لبن
بمعنى أن الإنسان هو اللى بيظبط حياته
على مزاجه هو
بس ده ميمنعش أن فيه جزء من الحياه بيكون خارج نطاق سيطرتك
والجزء ده بسيط جدا لا يتجاوز ال (5%)
والمشكله أن الناس كلها _بما فيهم أنا وأنت_ بنسيب الجزء الرئيسى (95%) وبنمسك فى الجزء التانى ...
فى ال (5%)...
كتير قوى مثلا تلاقى شباب نتيجتهم وحشه ولما تسأل حد فيهم عن السبب يقولك حظى وحش ... الدكتور كان غلس ...
أو المراقب سخيف أو ... أو ...
الحظ .. القدر .. الظروف ...
كل دى مصطلحات إخترعها الإنسان عشان يحاول يوهم نفسه انه هو مش مسئول وأن الغلط مش منه
مصطلحات بتكون بمثابه مخدر لضمير الواحد
أكيد القدر موجود
بس مش بالطريقه اللى الناس بتتكلم عنه
يعنى مش من القدر أن الواحد يفضل (منفض) للمذاكره طول الوقت ويجى يعك فى الإمتحان ويقول المراقب كان غلس
والامتحان كان صعب والتصحيح كان زباله و.....
مش ده القدر يا أخوانا
القدر ممكن نصنعه بأدينا
بس الموضوع محتاج شويه إراده حقيقيه
إراده وفعل
ومعاهم كوبايه شاى بلبن