كثيرة هي حفلات الزفاف في شهور الصيف وكل يوم نطالع أخباراً جديدة وسعيدة أغلبها عن حفلات الزواج بالصيف ... ومع تأزم الحوار بين النقيضين محمود مرعي وملكة القلم حول الشباب والفتيات... وتكملة لمسلسل المقالات الساخرة بالموقع ... تخيلنا الزواج عبر العصور الماضية التي لم نشهدها ولم نعرف كيف كان الزواج في هذه العصور وهذا من صنع الخيال لكنه لا شك يعبر عن كثير من الواقع بهذه الفترات فمثلاً
في عهد الفراعنة : بابا انا عايز اتجوز حت حور …خلاص يا ابنى خليها تنقل حاجتها فى قوضتك.. وابقى هاتلها حجرين صوان هدية.. مبروك يا تاح ... في عهد قريش : يا قوم ... إن عمرو بن الحكم بن تامر أشهر زواجه من متعوسة بنت الأشرم في دار ابن جدعان فلتذبح الذبائح ولترقص الغواني وليملأ الخمر شوارع قريش إحتفالاً بزواج إبن الحكم والعشاء بدار الندوة فى عصر الرومان :تتجوزينى يا افروديت …اتجوزك يا بانسيلوس …يللا بينا نبنى كوخ ع البحر ونعيش هناك يللا … بعد الفتح الاسلامى :ولدى خالد يا شيخ احمد بيريد يتجوز ابنتك البكر الكريمة.. وبيبنى خيمة.. ويقدم مهر بعير والله خالد ولدك زين الرجال ...وايش اتمنى غير رجل صالح يكون زوج لبنتى ..قيموا الافراح …مصر 1919 : انت ح تتجوز بنت الحاج عبد الجليل .. انا كلمته خلاص ووافق .. وضب قوضتك وهات خلخال ... فرحك يوم الخميس اللى جاى …طب مش اشوفها الاول يابا انت اتجننت يا ولد تشوفها ده ايه .. انت عايز تفضحنا …حاضر يابه .وفي الريف :كان الجواز علي الكنبة ... الواد الأول علي الكنبة ولو الواد الصغير حب يتجوز يخلوا الكنبة دورين في نفس الأوضة والبابور والطاصة والحلة والماجور ده كان بيجبوه ولاد الذوات واللندة الكشف دي كانت زي اللاب توب دلوقت …مصر 1960 …بقى يا ستى بنتك آمال جالها عريس …يا ألف نهار ابيض يا ألف نهار مبروك …جدع طيب وابن حلال موظف فى الحقانية . وماهيته مش بطالة .. اهو يبنوا حياتهم سوا بعد الجواز.. والا ايه رأيك يا أم العروسة؟ …الرأى رأيك يا أبو العروسة .. والله العيال ح يعجزونا يا ابو محمد.. فشر .. تدبل الوردة وريحتها فيها يا نرجوستى … مصر: 1980 اخرسى يا بنت... انا اللى يتجوز بنتى لازم يكون عنده شقة تمليك وعربية وسوبر ماركت بس يا ماما …ما فيش بس.. انا وابوكى قبل ما يموت فى الحرب كانت بتعدى علينا ايام ما بنلاقيش ناكل.. انا يا بنتى مش عايزاكى تتعذبى زى ما احنا اتعذبنا.. انتى ح تتجوزى فتحى ابن خالتك بس انا مش بحبه يا ماما الحب ما بيأكلش تونة فى الزمن ده يا فالحة امرك يا ماما وفي الريف ... الأب:…بعد المغرب إلبسي وخدي أمك وروحي للعمدة الحاج / مختار عبد الحق هتلاقيه جايب نفر اتجوزيه والحاج عبد البر هيبقي هناك هيكتب لكم الكتاب في التلافونة والفرح يوم الخميس عند الحنفية الكبيرة ... مصر 1990البنت: بابا ريكو حييجى يقابلك بكره وهو راجع من المول مع ديدى متتكلمش معاه فى اى ماديات من فضلك انا بشترى راجل واحنا معانا كتير وبعدين الكلام فى المهر والعفش والقايمه والفرح ده موضه قديمه وحاجات بلدى ياى انا اتفقت معاه على كل حاجه والفرح فى كافيه ماريانو فى المعادى على الضيق كده وانا جيت اعزمك انت ومامى …الاب: مبروك يا حبيبتى وفي الريف : الأب:بصي يا بنتي اين عمك عبد الستار لسه جاي من العراق وجايب مروحة ...دا انتي متطوليش ضوفره ... وهو بيشتغل ايه يا بابا ... شغال في مصنع وكسيب... اللي تشوفه يا به …مصر 2009 : بابى... دودى اللى اتعرفت عليه من الشات مشغل الويب كام (الكاميرا) و عايز يكلمك علشان يقرا معاك الفاتحه اصله ملتزم اوى و مصمم يدخل البيت من ماسنجره قصدى من بابه... الاب: على خيرة الله يا بنتى ده شكله فعلا ملتزم روحى شغلى الكاميرا و المايك وانا هلبس انا و مامتك ونجى نقرا الفاتحه مش انتوا اتفقتوا على كل شىء يا روحى يلا ربنا يتمم لكم بخير... مصر 2050 بابا بص صاحبي ميشو اللي معاية في الجروب بتاع الفيس بوك علي النت باعت لي فيزا كارت بـ 5000 دولار أجهز نفسي وأروح له أقضي معاه الشهرين بتوع الصيف وبعدها هيحدد إذا كنت هأكمل معاه ولا يبعت لواحدة تانية من الجروب ... وانا قلت اعرفكم ... الأب:طاب مشفوتيش حد من بتوع الشات اللي علي الياهو ليه بيبقوا جادين شوية عن بتوع الفيس بوك والهوتميل ... عموما الكلمة كلمتك واللي تشوفيه ... الأم:يا ألف نهار مبروك ... علي رأي المثل : عريس الوايرليس أحسن من عريس اللان
الوايرليس: النت الهوائي ... واللان : النت المركزي 
الجمعة أبريل 22, 2011 10:26 pm من طرف زائر
